ଦୁର୍ବଳ ହେଉଛି ବାତ୍ୟା "ଅସାନି"

ଆଜିଠୁ କମିବ ଭୀଷଣ ବାତ୍ୟା ‘ଅସାନି’ର ବଳ । ଦିଗ ବଦଳାଇବା ସହ ଏହା ଦୁର୍ବଳ ହେବା ପ୍ରକ୍ରିୟା ଆରମ୍ଭ ହେବ । ଗତ ୬ ଘଣ୍ଟା ହେବ ୫ କିଲୋମିଟର ବେଗରେ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରୁଛି । ଗୋପାଳପୁରଠାରୁ ଦକ୍ଷିଣ-ଦକ୍ଷିଣ-ପଶ୍ଚିମ ଦିଗରେ ୫୧୦ କିଲୋମିଟର ଦୂରରେ ରହିଛି । ସେହିପରି ପୁରୀଠାରୁ ଦକ୍ଷିଣ ପଶ୍ଚିମ ଦିଗରେ ୫୯୦ କିଲୋମିଟର ଦୂରରେ ରହିଛି । ଆଜି ମଧ୍ୟରାତ୍ରୀ ସୁଦ୍ଧା ଉତର ଆନ୍ଧ୍ରପ୍ରଦେଶ ଏବଂ ଓଡ଼ିଶା ନିକଟ ସମୁଦ୍ରରେ ପହଞ୍ଚିବ । ଉତ୍ତର-ଉତ୍ତର-ପୂର୍ବ ଦିଗରେ ମୁହାଁଇବା ସମ୍ଭାବନା ରହିଛି ।

ଏହା ଧୀରେ ଧୀରେ ଦୁର୍ବଳ ହେବ ଓ ୨୪ ଘଣ୍ଟା ମଧ୍ୟରେ ବାତ୍ୟାରେ ପରିଣତ ହେବ । ପରେ ଅବପାତରେ ପରିଣତ ହେବ । ପାଣିପାଗ ବିଭାଗର ଆକଳନ କହୁଛି, ୧୨ ତାରିଖ ବେଳକୁ ବାତ୍ୟା ଗୋପାଳପୁରଠାରୁ ୭୮ କିଲୋମିଟର ଦୂର ସମୁଦ୍ରରେ ଗତି କରିବ । ପୁରୀଠାରୁ ୧୫୩ କିଲୋମିଟର ଦୂର ସମୁଦ୍ରରେ ଥିବ । ସେହିପରି ରାଜଧାନୀ ଭୁବନେଶ୍ୱର ୧୯୯ କିଲୋମିଟର ଦୂରତାରେ ସମୁଦ୍ରରେ ଗତି କରିବ । ବଡ଼ କଥା ହେଉଛି ଓଡ଼ିଶା ସୀମା ପାଖେଇବା ପୂର୍ବରୁ ଅସାନି ଅବପାତର ରୂପ ନେଇ ସାରିଥିବ । ଏହି ରୂପ ଧରି ଅସାନି ପୂରା ଓଡ଼ିଶା ଉପକୂଳ ଅତିକ୍ରମ କରିବାର ସମ୍ଭାବନା ଅଧିକ ରହିଛି ।