ଅଂଶୁଘାତ ଏବଂ ତାହାର ପ୍ରତିକାର

ଆଜିର ଦିନମାନଙ୍କରେ ଅତିଶୟ ଗରମ ବଡିବା ସହ ତାପମାତ୍ରା ର ଅତିଶୟ ବୃଦ୍ଧି ଜନ ଜୀବନକୁ ପୁରା ଅସ୍ତବ୍ୟସ୍ତ କରିସାରିଲାଣି । ଏହି ସମୟରେ ଅଂଶୁଘାତର ସମ୍ଭାବନା ମଧ୍ୟ ବଢ଼ି ଯାଇଥାଏ । ସେଥିପାଇଁ ଜନସାଧାରଣଙ୍କୁ ସଚେତନତାର ଆବଶ୍ୟକତାର ସୃଷ୍ଟି ହୋଇଥାଏ । ଏଥିନିମନ୍ତେ ପ୍ରଶାସନ ଠାରୁ ଆରମ୍ଭ କରି କିଛି ସ୍ବେଚ୍ଛାସେବୀ ସଙ୍ଗଠନ ଯାଏଁ ଅଂଶୁଘାତ ସଚେତନତା ଉପରେ ଜୋର୍ ଦିଅନ୍ତି । ଏବଂ ଟିଭି, ରେଡ଼ିଓ, ସୋସିଆଲ ମିଡିଆରେ ବିଜ୍ଞାପନ ପ୍ରସାରିତ କରନ୍ତି । ଯାହାକି କିଛି ମାତ୍ରାରେ ଲୋକଙ୍କ ଉପରେ ପ୍ରଭାବ ପଡ଼େ । ଏବଂ ଅଂଶୁଘାତ ନ ହେବା ପାଇଁ ବିଭିନ୍ନ ପ୍ରକାରର ଉପାୟ ସବୁ ଅବଲମ୍ବନ କରନ୍ତି । ତେବେ ଆସନ୍ତୁ ଜାଣିବା ଅଂଶୁଘାତ ହେବାର କାରଣ ଓ ଲକ୍ଷଣ ସବୁ କଣ ରହିଛି ।

ଅଂଶୁଘାତର କାରଣ ଓ ଲକ୍ଷଣ :- ଅଂଶୁଘାତର ମୁଖ୍ୟ କାରଣ ହେଲା ସୂର୍ଯ୍ୟରଶ୍ମିର ଉତ୍ତାପ ବୃଦ୍ଧି । ଜଙ୍ଗଲ କ୍ଷୟ , କଳକାରଖାନା ଓ ଯାନବାହନର ବିଷାକ୍ତ ଗ୍ୟାସ୍ ଓ ଧୂଆଁ ଏହି ଉତ୍ତାପ ବୃଦ୍ଧିର ପ୍ରମୁଖ କାରଣ । ଜଙ୍ଗଲରୁ ବୃକ୍ଷଲତା କଟାଯିବାରୁ ବାୟୁମଣ୍ଡଳରେ ଅମ୍ଳଜାନର ପରିମାଣ କ୍ଷୟ ଘଟିବାରେ ଲାଗିଛି । ବାୟରେ ଜଳୀୟବାଷ୍ପ ପରିମାଣ ଓ ବର୍ଷା କମିଯାଉଛି । ଜଙ୍ଗଲ କଟାଯାଇ କଳକାରଖାନା ବସୁଛି , ନୂଆ ସହର ବଜାର ଗଢ଼ା ଚାଲିଛି , କୋଠାବାଡ଼ି ନିର୍ମାଣ ଚାଲିଛି । ବୃକ୍ଷ ଜଙ୍ଗଲ ନାଶ ଘଟି କଂକ୍ରିଟ ଜଙ୍ଗଲ ସୃଷ୍ଟି ହେଉଛି । ଯାହାକି ପୃଥିବୀର ଉତ୍ତାପ ବୃଦ୍ଧି ଓ ଅଂଶୁଘାତ ନିମନ୍ତେ ଦାୟୀ ହେଉଛି । ସେଥିପାଇଁ ଦେଖିବାକୁ ଗଲେ ଆମେ ମାନେ ଅଂଶୁଘାତ ପାଇଁ ସ୍ଵଂୟ ହିଁ ଦାୟୀ ।

ଜାଣିବା କଥା - ଆମ ଶରୀରର ତାପମାତ୍ରା ପ୍ରାୟ ୩୭ ଡିଗ୍ରୀ ସେଲସିୟସ ଥାଏ । ଏହି ତାପମାତ୍ରା ବୃଦ୍ଧିପାଇଲେ ଆମ ମସ୍ତିଷ୍କ ତାକୁ ନିୟନ୍ତ୍ରଣ କରେ । ଶରୀରର ତାପମାତ୍ରା ବଢିଲେ ଶରୀରରୁ ଝାଳ ବାହାରି ତାହାକୁ କମାଇଦିଏ । ଯଦି ମସ୍ତିଷ୍କ ତାପ ହ୍ରାସ କରିବାରେ ବିଫଳ ହୁଏ , ତେବେ ମନୁଷ୍ୟ ଅଂଶୁଘାତରେ ଆକ୍ରାନ୍ତ ହୋଇଥାଏ ।

ସତର୍କତା :-

୧) ଟାଣ ଖରାରେ କଠିନ ପରିଶ୍ରମ କରନ୍ତୁ ନାହିଁ ।

୨) ଖରାବେଳେ ପଦାକୁ ବାହାରନ୍ତୁ ନାହିଁ ।

୩) ଜରୁରୀ କାର୍ଯ୍ୟରେ ବାହାରକୁ ଯିବାବେଳେ ମୁଣ୍ଡରେ ଓଦା ଗାମୁଛା , ଛତା , ଜୋତା ଓ କଳା ଚଷମା ବ୍ୟବହାର କରନ୍ତୁ । 

୪) ଘରୁ ବାହାରିବା ଆଗରୁ ଯଥେଷ୍ଟ ପାଣି ପିଅନ୍ତୁ ଓ ସାଥ୍‌ରେ ଏକ ବୋତଲରେ ପାଣି ନିଅନ୍ତୁ । ପୋଷାକ ପରିବର୍ତ୍ତେ ଧଳା , ହାଲୁକା ଓ ଢିଲା ପୋଷାକ ପରିଧାନ କରନ୍ତୁ । 

୫) ହାଲିଆ ଲାଗିଲେ ଛାଇ ଯାଗା କିମ୍ବା ଫ୍ୟାନ ତଳେ ବସନ୍ତୁ କିମ୍ବା ଅଳ୍ପ ସମୟ ବିଶ୍ରାମ କରନ୍ତୁ । ନିର୍ଜଳିକରଣ ଅନୁଭୂତ ହେଲେ ଓ.ଆର.ଏସ. ଦ୍ରବଣ , ଆଖୁରସ , , ଘୋଳ ଦହି ପିଅନ୍ତୁ ।

୬) ଟିଣ ଆଜବେଷ୍ଟସ ଘରେ ନଡା / ଛଣ ବିଛାନ୍ତୁ । 

୭) ବିନା ଛତା , ଜୋତା ଓ ପାଣି ବୋତଲରେ ବାହାରକୁ ବାହାରନ୍ତୁ ନାହିଁ ।

୮) ଏହି ସମୟରେ ମାଦକ ଦ୍ରବ୍ୟ , ମଦ୍ୟପାନ ଇତ୍ୟାଦି ସେବନ କରନ୍ତୁ ନାହିଁ ।

୯) ଛୋଟ ପିଲା , ବୟସ୍କ ବ୍ୟକ୍ତି , ଗର୍ଭବତୀ ମହିଳା ମାନଙ୍କୁ ଖରାବେଳେ ବାହାରକୁ ଛାଡନ୍ତୁ ନାହିଁ । 

୧୦) ଅଂଶୁଘାତ ହୋଇଥିବା ବ୍ୟକ୍ତିଙ୍କୁ ତୁର ଡାକ୍ତରଖାନା ନେଇ ଚିକିତ୍ସା କରାନ୍ତୁ । ଗୃହପାଳିତ ପଶୁ ପକ୍ଷୀମାନଙ୍କୁ ଛାଇରେ ରଖନ୍ତୁ ଏବଂ ପ୍ରଚୁର ପାଣି ପିଇବାକୁ ଦିଅନ୍ତୁ ।